દુબઈ: સંયુક્ત આરબ અમીરાત (UAE)એ પાકિસ્તાનને એક મોટો ઝટકો આપ્યો છે. હકીકતમાં, યુએઈની સરકારે પાકિસ્તાન સહિત 13 દેશોના નાગરિકોના UAE પ્રવાસ પર પ્રતિબંધ મૂકી દીધો છે. યુએઈએ પાકિસ્તાન સહિત 13 દેશોના નાગરિકોને નવા વીઝા ઈશ્યૂ કરવા પર રોક લગાવી છે. સંયુક્ત આરબ અમીરાતની માલિકીના બિઝનેસ પાર્ક દ્વારા જાહેર કરાયેલા દસ્તાવેજ મુજબ, ઈરાન, સીરિયા, અફઘાનિસ્તાન અને પાકિસ્તાન સહિત 13 મુસ્લિમ બહુમતીવાળા દેશોના નાગરિકોને હાલ નવા વીઝા ઈશ્યૂ કરવા સામે મનાઈ ફરમાવી દેવાઈ છે.
આ મામલે જોડાયેલા એક સૂત્રએ જણાવ્યું કે, અફઘાન, પાકિસ્તાન સહિત ઘણા અન્ય દેશોના નાગરિકો માટે અસ્થાયી રીતે વીઝા પર રોક લગાવાઈ છે. સૂત્રો મુજબ, સુરક્ષા ચિંતાઓને લઈને આ રોક લગાવાઈ છે. દસ્તાવેજમાં સુરક્ષા ચિંતાઓની વિગતો નથી અપાઈ. બિઝનેસ પાર્કમાં કામ કરતી કંપનીઓ માટે દસ્તાવેજ મોકલી દેવાયો છે. આ આદેશ 18 નવેમ્બરે લાગુ થયો છે.
દસ્તાવેજમાં કહેવાયું છે કે, નોકરી અને ફરવાના વીઝા માટે અરજી કરનારા નાગરિકોની અરજીને સસ્પેન્ડ કરી દેવાઈ છે. આ પ્રતિબંધ ઈરાન, સીરિયા, અફઘાનિસ્તાન, પાકિસ્તાન, સોમાલિયા, લીબિયા, યમન, અલ્જેરિયા, કેન્યા, ઈરાક, લેબનાન, ટ્યૂનીશિયા અને તુર્કીના નાગરિકો પર લાગુ થાય છે.
જોકે, યુએઈની ફેડરલ ઓથોરિટી ફોર આઈડેન્ટિટી એન્ડ સિટીઝનશિપ તરફથી અહેવાલ લખાયો ત્યાં સુધી કોઈ ટિપ્પણી કરવામાં આવી નથી. ઈસ્લામિક સ્ટેટ દ્વારા સાઉદી અરેબિયામાં કરાયેલા બોમ્બ હુમલા બાદ યુએઈમાં રહેલા ફ્રાન્સના દૂતાવાસે પોતાના નાગરિકોની સુરક્ષા માટે અપીલ કરી હતી. જેના એક સપ્તાહ બાદ આ પત્ર બહાર પડાયો છે.
જેદ્દાના કબ્રસ્તાનમાં થયો હતો બોમ્બ વિસ્ફોટ
ઉલ્લેખનીય છે કે, સાઉદી અરેબિયામાં જેદ્દા સ્થિત કબ્રસ્તાનમાં બોમ્બ વિસ્ફોટ થયો હતો, જેમાં ઘણા લોકો ઘાયલ થયા હતા. હકીકતમાં, ત્યાં સો વર્ષ પહેાલ પ્રથમ વિશ્વ યુદ્ધ પુરું થયું તેની વર્ષગાંઠ ઉજવવા માટે યુરોપીય ડિપ્લોમેટ ઉપસ્થિત હતા. આ આયોજન ફ્રાંસની એમ્બેસી તરફથી કરવામાં આવ્યું હતું.
