નવી દિલ્હીઃ ભારત અને જાપાને સાથે મળી ઈન્ડો-પેસિફિક રિજનમાં પોતાની ભાગીદારી વધારે મજબૂત બનાવવા કમર કસી લીધી છે. ભારત અને ચીને 5જી ટેક્નોલોજી, આર્ટિફિશિયલ ઈન્ટેલિજન્સ અન્ય કેટલીક મહત્વની બાબતો અંગે મહત્વના કરાર કરવાનું નક્કી કરી લીધું છે. બુધવારે ભારતના વિદેશ મંત્રી એસ જયશંકર અને જાપાનના વિદેશ મંત્રી તોશિમિત્સુ મોટેગી વચ્ચે ટોક્યોમાં એક બેઠક યોજાઈ હતી અને ત્યારબાદ જાહેર કરવામાં આવ્યું હતું કે જાપાન ઈન્ડો-પેસિફિક ઓસિયન્સ ઈનિશિયેટિવ (આઈપીઓઆઈ)ના કનેક્ટિવિટી પિલર તરીકે મુખ્ય ભાગીદાર થવા માટે તૈયાર થઈ ગયું છે.

ચીનને ટક્કર આપવા માટે ભારત-જાપાને મીલાવ્યા હાથ

આઈપીઓઆઈ ઈન્ડો-પેસિફિક વિસ્તારમાં સુરક્ષિત મેરિટાઈમ ડોમેન બનાવવા માટે પ્રયાસ કરતું માળખું છે. આ વિસ્તારમાં ચીન પોતાની મિલિટ્રી પ્રવૃત્તિઓ વધારી રહ્યું છે જેનાથી વૈશ્વિક ચિંતા વધી ગઈ છે. જયશંકરે એક ટ્વિટ કરીને જણાવ્યું હતું કે, ભારત-જાપાનના વિદેશ મંત્રીઓની 13મા સ્ટ્રેટેજિક ડાયલોગમાં વિકાસ માટેની યોજનાઓને ધ્યાનમાં રાખતા ભારત-જાપાન વચ્ચે આ જોડાણ વધારે મજબૂત બનશે.

ડિજિટલ ટેક્નોલોજીની ભૂમિકાને સ્વીકારવામાં આવી

ડિજિટલ ટેક્નોલોજીની ભૂમિકામાં વધારો થઈ રહ્યો છે જેને ધ્યાનમાં રાખતા બંને મંત્રીઓએ સુરક્ષિત ડિજિટલ અને સાયબર સિસ્ટમ પર ભાર મૂક્યો હતો. તેને ધ્યાનમાં રાખતા સાયબર સિક્યુરિટી એગ્રીમેન્ટને અંતિમ ઓપ આપવામાં આવ્યો છે, તેમ વિદેશ મંત્રાલયે જણાવ્યું હતું. તેમાં તે પણ કહેવામાં આવ્યું છે કે, આ એગ્રીમેન્ટ કેપેસિટી બિલ્ડિંગ, સંશોધન અને વિકાસ, સુરક્ષા તથા ક્રિટિકલ ઈન્ફોર્મેશન સ્ટ્રક્ચર, 5જી, ઈન્ટરનેટ ઓફ થિંગ્સ (આઈઓટી), આર્ટિફિશિયલ ઈન્ટેલિજન્સ તથા અન્ય બાબતોને પ્રમોટ કરશે.

ચીનની કંપનીને પડશે મોટો ફટકો

5જી ટેક્નોલોજીમાં ભારત અને જાપાન વચ્ચેનો સહયોગ ચીન માટે મોટો ફટકો છે. 5જી ટેક્નોલોજીમાં ચીનની હુવાવે કંપનીને અન્ય દેશોમાંથી મોટો ફટકો પડ્યો છે. ઘણા દેશોએ હુવાવેને પોતાના દેશમાંથી જતા રહેવાનું કહ્યું છે. સુરક્ષાના કારણોને લઈને અમેરિકાએ હુવાવે પર પ્રતિબંધ મૂકી દીધો છે અને અમેરિકા ઇન્ય દેશોને પણ ચીનની ટેલિકોમ્યુનિકેશનની આ જાયન્ટ કંપનીથી દૂર રહેવાનું દબાણ કરી રહ્યું છે.

5જી ટેક્નોલોજી નેક્સ્ટ જનરેશન ટેક્નોલોજી છે

5જી ટેક્નોલોજી એ નેક્સ્ટ જનરેશન ટેક્નોલોજી છે અને જેની ડાઉનલોડ સ્પીડ વર્તમાન 4જી એલટીઈ નેટવર્ક્સ કરતા 10થી 100 ગણી વધારે છે. આગામી સમયમાં આ ઘણા દેશોમાં આ ટેક્નોલોજીનો ઉપયોગ કરવામાં આવી શકે છે. જેનાથી ઈન્ટરનેટની સ્પીડ અત્યંત વધી જશે.