ઓગસ્ટના અંતે બંધ થશે સીરિયલ ‘ભાખરવડી’, પ્રોડ્યુસરે કહ્યું- ‘આ માટે કોરોના જવાબદાર નથી

ટીવી શો ‘ભાખરવડી’ 28 ઓગસ્ટથી બંધ થઈ રહ્યો છે. સીરિયલ બંધ થવા પાછળનું કારણ કોરોના વાયરસ ગણાવાઈ રહ્યું હતું. થોડા સમય પહેલા જ શોના કોરોના સંક્રમિત ક્રૂ મેમ્બરનું મોત થયું હતું અને અન્ય કેટલાક લોકો સંક્રમિત હતા, જેના કારણે સીરિયલ પર પડદો પડી રહ્યો હોવાની ચર્ચા ચાલી રહી છે. જો કે, શોના પ્રોડ્યુસર જે.ડી. મજેઠિયાએ આ અફવાને ફગાવી છે.

જે. ડી. મજેઠિયાએ કહ્યું, “કોરોનાના કેસ જુલાઈના છેલ્લા અઠવાડિયામાં આવ્યા હતા. તે પછી અમે ફરીથી શૂટિંગ શરૂ કર્યું હતું અને વિશેષ કાળજી લીધી હતી. કોરોના વાયરસના કારણે ચેનલે શો બંધ કરવાનો નિર્ણય કર્યો નથી. પ્રાઈમ ટાઈમ સ્લોટમાં આવતા ટીવી શો માટે લોકડાઉન કપરું સાબિત થયું છે. હાલ સુશાંત સિંહ રાજપૂતના કેસમાં લોકોને વધારે રસ છે. એટલે જ પ્રાઈમ ટાઈમ દરમિયાન દર્શકો સીરિયલો કરતાં વધુ ન્યૂઝ જોવે છે. વ્યૂઅરશીપની દ્રષ્ટિએ વાત કરું તો બે-ત્રણ શોને બાદ કરતાં અન્ય કોઈ સીરિયલો સારો દેખાવ કરી રહી હોય તેવું લાગતું નથી.”

“લોકડાઉન પછી મને લાગ્યું કે લોકોનો રસ બદલાયો છે, જેના કારણે મારા શો પર પણ અસર પડી છે. અમે શોમાં નવા ટ્વિસ્ટ લાવવાની કોશિશ કરી પરંતુ દર્શકોને આકર્ષી ના શક્યા. એટલે જ મને લાગે છે કે ચેનલનો નિર્ણય યોગ્ય છે”, તેમ જે.ડી. મજેઠિયાએ જણાવ્યું.

જે.ડી. મજેઠિયાને લાગે છે કે આગામી સમય ટીવી સીરિયલો માટે વધુ મુશ્કેલ બનશે. તેમણે કહ્યું, “સપ્ટેમ્બરથી IPLની નવી સીઝન શરૂ થઈ રહી છે. ત્યારે નક્કી છે કે દર્શકો બીજું કંઈ પણ જોવા કરતાં મેચ વધારે જોશે. એટલે હવે હું નવી સ્ક્રીપ્ટ પર ધ્યાન આપીશ, તેના પર કામ કરીશ અને પછી નવા ટીવી શોની તૈયારી કરીશ.”

નોંધ: "Royal Gujju" ના કોઈ પણ લખાણ ની કોપી કરતા પહેલા અમારી લેખિત મંજુરી લેવી ફરીજીયાત છે.

લેટેસ્ટ ન્યૂઝથી અપડેટ રહેવા માટે નીચે આપેલી લીંક પર કલીક કરી જોડાયેલા રહો "Royal Gujju" સાથે.

જોડાઓ:  Facebook | Twitter | Instagram | YouTube