પુત્રવધુએ સસરાને 60 ટકા લીવરનો ભાગ દાન કરીને આપ્યું નવજીવન – અતૂટ સંબંધોનું ઉમદા ઉદાહરણ
હાલ તબીબી વિજ્ઞાન એટલુ આગળ વધી ગયું છે કે લોકોના જીવ બચાવવા માટે અગણિત વિકલ્પો ઉપલબ્ધ છે. પણ જેમ ભગવાનની ઇચ્છા પ્રમાણે પાંદડુ પણ ન હલે તેવું અહીં પણ છે. આ 61 વર્ષિય વ્યક્તિને ત્રણ પુત્રો અને છ ભાઈ-ભાંડરડા હોવા છતાં કોઈનું પણ લીવર મેચ ન થયું અને છેવટે પુત્રવધુનું મેચ થતાં પુત્રવધુએ એક ક્ષણનો પણ વિચાર કર્યા વગર પોતાનૂં 60 ટકા લીવર સસરાને ડોનેટ કરી દીધું.
અમદવાદનો આ ઉદહારણરૂપ કિસ્સો છે. અહીંની 30 વર્ષિય પુત્રવધુએ 61 વર્ષિય સસરાને પોતાનું 60 ટકા લીવર દાન કર્યું છે. સસરાની તબિયત એટલી હદે લથડી પડી હતી કે તેમની પાસે લીવર મેળવવા ઉપરાંત બીજો કોઈ વિકલ્પ જ બચ્યો નહોતો. અને તેના માટે લીવર મેચ થવું પણ ખૂબ જરૂરી હતું. બીજી બાજુ તેમનું નામ પણ વેઇટિંગમાં બોલતું હતું માટે રાહ જોતાં મોડું થઈ જાય તેમ હતું. છેવટે ડોક્ટર્સે તેમને જણાવ્યું કે જો કોઈ પરિવારમાં જ લીવર આપવા તૈયાર હોય અને લીવર મેચ થઈ શકે તેમ હોય તો તેમને બચાવી શકાય તેમ છે.
દર્દીને કેટલાક સમયથી તેમના લિયવરમાં સમસ્યા હતી. છેવટે તેમને લિવરસોરાઇસિસ હોવાનું હોસ્પિટલ દ્વારા નિદાન કરવામા આવ્યું. ત્યાર બાદ તેમને એક ખાનગી હોસ્પિટલમાં સારવાર અર્થે દાખલ કરવામા આવ્યા અને ત્યાં ડોક્ટર્સે તેમને જણાવ્યું કે તેમના માટે હવે લીવર ટ્રાન્સપ્લાન્ટ સિવાય બીજો કોઈ જ વિકલ્પ નથી. બીજી બાજુ ટ્રાન્સપ્લાન્ટ માટેની યાદીમાં તેમનું નામ પાછળ હતું માટે તેમને તાત્કાલીક લીવર ટ્રાન્સપ્લાન્ટની જરૂર હોવાથી સૌ પ્રથમ તો તેમના સંબંધીઓમાં જ તે માટે તપાસ કરવામા આવી.
તેમને છ ભાઈ-બહેન અને ત્રણ પુત્રો છે પણ તે બધામાં કોઈનું પણ લીવર તેમની સાથે મેચ ન થયું. અને ત્યાર બાદ તેમની સ્થિતિ દીવસેને દીવસે નબળી જ પડતી ગઈ. અને તાત્કાલીક હોસ્પિટલ દ્વારા મુંબઈ, ચેન્નઈ, દિલ્લી, અમદાવાદ, હૈદરાબાદ, બેંગ્લોર જેવા શહેરોમાં આવેલા કેન્દ્ર પર કેડવર લિવર માટે નોંધણી કરાવી પણ લોકડાઉનના કારણે તેમને મદદ ન મળી શકી. પણ આ દરમિયાનની તપાસમાં તેમની પુત્રવધુનું લીવર તેમની સાથે મેચ થઈ ગયું અને તાત્કાલીક અમદાવાદની જ એક હોસ્પિટલમાં બન્નેને દાખલ કરવામા આવ્યા અને પુત્રવધુએ પોતાનું 60 ટકા લીવર સસરાને દાન કરીને તેમનો જીવ બચાવ્યો.
સસરા પુત્રવધુનો આભાર માનતા થાકતા નથી
સસરા પોતાની પુત્રવધુનો આભાર માનતા થાકતા નથી. તેઓ જણાવે છે કે તેઓ પોતાની પુત્રવધુના લીવરદાનથી તેણીના જન્મોજનમના ઋણી બની ગયા છે. તો બીજી બાજુ પુત્રવધુ પણ પોતાના સસરાના વખાણ કરતા થાકતી નથી. તેણી જણાવે છે કે તેના સસરા તેણીને પિતા કરતાં પણ વધારે રાખે છે. તેણીને ક્યારેય પોતે સાસરે હોય તેવો અનુભવ નથી થવા દીધો. જો કે શરૂઆતમાં તો તેણીના સસરા પુત્રવધુનું લીવર લેવા નહોતા માગતા પણ તેણીના માતાપિતા તેમજ ભાઈએ છેક રાજસ્થાનથી તેમને સમજાવવા માટે આવવું પડ્યું અને છેક ત્યારે તેઓ પુત્રવધુનું લીવર લેવા માન્યા.
